Mae Cadw yn asiantaeth weithredol sy´n rhan o Gynulliad Cenedlaethol Cymru gyda chyfrifoldeb dros ymgymryd â dyletswyddau statudol y Cynulliad i gofnodi, amddiffyn a helpu diogelu adeiladau hanesyddol a henebion ym mhob rhan o Gymru. Mae´n llunio rhestrau o adeiladau o bwys pensaernïol neu hanesyddol arbennig ac yn darparu grantiau ar gyfer eu hatgyweirio. Mae hefyd yn cadw Rhestr o Henebion o bwys cenedlaethol; yn rheoli gwaith ar y safleoedd hyn; yn darparu grantiau ac yn llunio cytundebau rheoli i helpu gyda gwaith i ddiogelu´r safleoedd hyn dros y tymor hir yn ogystal ag ariannu rhaglenni o waith archeolegol (yn bennaf trwy´r pedair Ymddiriedolaeth Archeolegol yng Nghymru) i gofnodi safleoedd archeolegol sydd dan fygythiad ac i gynnig cyngor i awdurdodau cynllunio lleol. Mae Cadw hefyd yn gyfrifol am ddiogelu, cyflwyno a marchnata 130 o safleoedd hanesyddol sydd yng ngofal uniongyrchol Cynulliad Cenedlaethol Cymru.